پاکستان میں سیلاب دنیا کیلئے ایک حقیقی ویک اپ کال ہے: انجلینا جولی

  • جمعرات 22 / ستمبر / 2022

امریکی اداکارہ اور انسان دوست رضاکار انجلینا جولی اس وقت سیلاب کے متاثرین سے ملنے پاکستان میں ہیں۔ اس دوران انہوں نے نیشنل فلڈ رسپانس کوآرڈینیشن سینٹر کا بھی دورہ کیا۔

اس موقع پر این ایف آر سی سی کے ڈپٹی چیئرمین احسن اقبال نے ان کا خیر مقدم کیا اور ملکی تاریخ کے سب سے تباہ کن سیلاب کے دوران پاکستان آنے پر شکریہ ادا کیا۔ اداکارہ منگل کی سہ پہر پاکستان پہنچیں اور دادو کا دورہ کیا تھا جہاں انہوں نے سیلاب سے ہونے والی تباہی کا جائزہ لیا اور متاثرین سے ملاقات کی۔ بدھ کے اجلاس کے دوران انہیں سیلاب کے ردعمل اور اب تک کیے گئے اقدامات کے بارے میں بتایا گیا۔

اس موقع پر گفتگو کرتے ہوئے انجلینا جولی نے کہا کہ میں نے کبھی ایسا کچھ نہیں دیکھا، جیسا کہ آپ نے ذکر کیا ہے۔ میں کئی بار پاکستان آئی ہوں۔ خیال رہے کہ انجلینا جولی اس سے قبل 2010 کے سیلاب اور 2005 میں زلزلے کے متاثرین سے ملنے کے لیے پاکستان آئی تھیں۔

وہ فی الحال انٹرنیشنل ریسکیو کمیٹی کے ایمرجنسی ریسپانس آپریشنز کے ایک رکن کے طور پر دورہ کر رہی ہیں۔ امریکی اداکارہ نے کہا کہ میں بین الاقوامی برادری کو مزید کام کرنے پر زور دینے میں بالکل آپ کے ساتھ ہوں۔ مجھے ایسا لگتا ہے کہ ہم اکثر امداد کی اپیلوں کی بات کرتے ہیں لیکن یہ صورت حال بہت زیادہ مختلف ہے۔

مجھے لگتا ہے کہ یہ دنیا کے لیے ایک حقیقی ویک اپ کال ہے کہ ہم کہاں کھڑے ہیں۔ یہ کہ موسمیاتی تبدیلی نہ صرف حقیقی ہے بلکہ آ رہی ہے اور تقریباً آچکی ہے۔ خیال رہے کہ اداکارہ انجلینا جولی اقوام متحدہ کی پناہ گزین کمیٹی یو این ایچ سی آر کی خصوصی سفیر ہیں اور کمیٹی کے لیے خیر سگالی سفیر کے طور پر 11 سال تک خدمات انجام دے چکی ہیں۔

ان کا کہنا تھا کہ ایسے فرد کے طور پر جو برسوں سے انسانی امداد کا حصہ رہا ہے، ہم اکثر کسی بحران کو دیکھتے ہیں اور سوچتے ہیں کہ اسے کیسے حل کیا جائے۔ ہم کیا کر سکتے ہیں، کیا تعمیر کریں، بچوں کی مدد کریں یا خوراک دیں اور اب ہم اس طرح کی صورتحال میں ہیں کہ جہاں ضروریات بہت زیادہ ہیں اور ہر کوشش بہت سارے لوگوں کے لیے زندگی اور موت کا معاملہ ہے۔

انہوں نے بتایا کہ میں نے ہر موجودہ کوشش دیکھی ہے، میں فوج اور آئی آر سی کے اپنے ساتھیوں کے ساتھ رہی ہوں۔ میں نے دیکھا ہے کہ وہ جانیں بچ گئی ہیں لیکن میں لوگوں سے بات کر رہی ہوں اور سوچ رہی ہوں کہ اگر کافی امداد نہ ملی تو وہ آئندہ چند ہفتوں میں یہاں نہیں ہوں گے۔

اداکارہ نے کہا کہ وہ گزارا نہیں کر پائیں گے۔ یہاں بہت سے بچے غذائیت کی انتہائی کمی کا شکار ہیں اور اگر انہوں نے آئندہ کچھ ماہ گزارا کر بھی لیا تو آگے سردیاں آرہی ہیں، فصلیں اور کھیتی باڑی تباہ ہے۔ لیکن مجھے یہ کہنا بھی مناسب نہیں لگتا کیوں کہ میں اس سے نہیں گزر رہی۔ اس لیے میں صرف بات کرنے اور مدد کرنے کی کوشش کر سکتی ہوں۔

انہوں نے کہا کہ وہ تصور نہیں کر سکتیں کہ اس صورتحال میں کیا محسوس ہوتا ہے۔

loading...